Эдийн засгийн хүндрэлийг даван туулах арга хэмжээний тухай УИХ-ын тогтоолын төслийг Засгийн газраас пүрэв гарагт өргөн мэдүүлэх хүлээлттэй байна. Тогтоолын төслийг макро эдийн засгийг тогтворжуулах, эдийн засгийн бодит өсөлтийг хангах чиглэлээр хийх ажлын төлөвлөгөөний хамт УИХ-д өргөн барина гэж мэдээлсэн юм. Засгийн газрын ээлжит бус хуралдаанаар Ашигт малтмалын тухай хуульд нэмэлт, өөрчлөлт оруулах тухай хуулийн төслийг хэлэлцээд УИХ-д өргөн мэдүүлэхээр тогтлоо. Стратегийн ач холбогдол бүхий ашигт малтмалын ордын ашиглалтын тусгай зөвшөөрөл эзэмшигч нь Төрийн эзэмшлийн хувь хэмжээг шилжүүлэн авах тохиолдолд тусгай зориулалт бүхий төлбөр төлөх асуудлыг зохицуулах нь энэхүү өөрчлөлтийн үндэслэл болжээ. Хуулийн нэмэлт, өөрчлөлтийн хүрээнд ашиглалтын тусгай зөвшөөрөл эзэмшигч нь хуулийн төслийн дагуу Төрийн эзэмшлийн хувь хэмжээг хэвээр хадгалах, эсвэл тусгай зориулалт бүхий ашигт малтмалын нөөц ашигласны төлбөр төлөх сонголт хийх боломж бүрдсэн байна. Ингэснээр Төрийн эзэмшлийн хувь хэмжээг шилжүүлэн авах эрх нээлттэй байх ажээ. Харин тухайн ордын Техник Эдийн Засгийн Үндэслэл, ашигт ажиллагаа, хөрөнгө оруулалт, ордын нөөцийн болон борлуулалтын орлогын хэмжээ зэргийг харгалзаж, ашиглалтын тусгай зөвшөөрөл эзэмшигчтэй хийх яриа хэлэлцээний үр дүнд төлбөрийн хувь хэмжээг Засгийн газраас тусгайлан тогтоохоор болжээ.

Б.Батманлай

Холбоо барих: batmanlai.b@bloombergtvmongolia.com

minjma.g@bloombergtvmongolia.com