Ашиглалтад оруулсан 929 айлын орон сууцыг Төрийн өмчийн түрээсийн орон сууцны санд шилжүүлнэ
Засгийн газрын ээлжит хуралдаанаар Төрийн Орон Сууцны Корпорацийн захиалгаар Улаанбаатар болон орон нутагт барьж ашиглалтад оруулсан 929 айлын орон сууцыг Төрийн өмчийн түрээсийн орон сууцны санд шилжүүлэхээр шийдвэрлэсэн байна. Тодруулбал Улаанбаатар хотод баригдсан 350 орон сууц, Архангай, Увс, Дархан-Уул, Хэнтий, Ховд аймгийн төвүүд, Сэлэнгэ аймгийн Зүүнхараа, Хэнтий аймгийн Бор-Өндөрт баригдсан 579 орон сууцыг Төрийн өмчийн түрээсийн орон сууцны санд шилжүүлэх юм байна. Түрээсийн нэг сарын төлбөрийг орон сууцны нийт талбайн хэмжээ, өрөөний тооноос хамааруулан Улаанбаатарт 200-280 мянган төгрөг, орон нутагт 140-230 мянган төгрөг байхаар тогтоогоод байна. Энэ нь зах зээлийн ханшаас 3-4 дахин бага байгаа юм. "Тэнхлэг зууч" компанийн мэдээлснээр өнгөрсөн оны 12 дугаар сарын байдлаар зах зээлд нэг өрөө байрны түрээсийн дундаж үнэ 436 мянган төгрөг, хоёр өрөө байрных 591 мянган төгрөг, гурван өрөө нь 726 мянга, дөрвөн өрөө байр 907 мянган төгрөг байсан байна. Түрээсийн дундаж үнийг өнгөрсөн оны мөн үетэй харьцуулахад 13.2 хувиар буурчээ.
Э.Нарантунгалаг
Холбоо барих: narantungalag.e@bloombergtvmongolia.com
minjma.g@bloombergtvmongolia.com