Азийн хөгжлийн банкны захирлуудын зөвлөл 130 сая ам.долларын бодлогын зээлийг Монгол Улсад олгохоор шийдвэрлэлээ. Энэхүү зээлийн санхүүжилтийг Улаанбаатар хотын агаарын чанарыг сайжруулахад зарцуулна. Ингэхдээ утааны асуудлыг шийдвэрлэх бодлогод шинэчлэл хийх чиглэлд дэмжлэг үзүүлэхээр болсон талаар Азийн хөгжлийн банкны Цаг уурын өөрчлөлтийн мэргэжилтэн Мариа Пиа Анкора мэдэгдлээ. Мөн тэрбээр “Улаанбаатар хотын агаарын бохирдол аюултай түвшинд хүрсэн нь хот төлөвлөлт, дэд бүтцийн хөрөнгө оруулалт тааруу байснаас үүдсэн“ гэдгийг онцолсон байна. Үүнээс гадна "Нэгдсэн бодлого зохицуулалт дутагдалтай байсан нь агаарын бохирдлын гол шалтгаануудын нэг" гэж дүгнэжээ. "Өвлийн цагт Улаанбаатар хот агаарын чанарын үзүүлэлтээр дэлхийн хамгийн бохирдолтой хотуудын тоонд ордог. Дэлхийн хамгийн хүйтэн нийслэл хотын гэр хорооллын иргэд нүүрс хэрэглэдэг нь үүний шалтгаан" хэмээн Азийн хөгжлийн банкны мэдээлэлд дурджээ. Үүний улмаас оршин суугчид, ялангуяа хүүхдүүдийн эрүүл мэндэд ноцтой эрсдэл учирч байгаа талаар мөн онцолсон байна.

Тиймээс Азийн хөгжлийн банк үзүүлэх туслалцаагаа гурван гол чиглэлд хандуулахаар болжээ. Тухайлбал, тээвэр болоод айл, өрхийн халаалтаас үүдсэн агаарын бохирдол, хүлэмжийн хий ялгаруулалтыг бууруулах бодлого зохицуулалтыг сайжруулах, Засгийн газрын цаашдын зарцуулалтад иргэдийн эрүүл мэндийг хамгаалах, агаарын бохирдлыг бууруулах асуудлыг эн тэргүүнд тавих талд зөвлөмж өгөх юм байна. Мөн бохирдол багатай түлш ашиглах, хот төлөвлөлтийг сайжруулах урт хугацааны бодлогыг бий болгох зэрэгт анхаарч ажиллахаар төлөвлөжээ. Азийн хөгжлийн банк 130 сая ам.долларын зээлээ хоёр үе шаттайгаар олгоно. Эхний ээлжид 100 сая ам.доллар, хоёрдугаар ээлжид 30 сая ам.долларын зээл олгох ажээ. Энэхүү зээлийг олгохдоо санхүүжилтийг хэр үр дүнтэй зарцуулсныг харгалзан үзэх юм байна.

Засгийн газар 2019 оны тавдугаар сараас эхлэн Улаанбаатар хот руу түүхий нүүрс оруулахгүй байхаар шийдвэрлээд байна. Мөн БНСУ-аас авах 500 сая ам.долларын зээлийг агаарын бохирдлыг бууруулах ажилд зарцуулна гэж Ерөнхий сайд мэдэгдсэн юм.

Э.Анхбаяр

Холбоо барих: ankhbayar.e@bloombergtvmongolia.com

minjma.g@bloombergtvmongolia.com