Тавдугаар сард АНУ-ын үйлчилгээний салбарын өсөлт нэмэгдсэн үзүүлэлттэй гарсан байна. Өнгөрсөн тавдугаар сард АНУ-ын үйлчилгээний салбарын өсөлт өмнөх сарынхаас нэмэгдсэн нь компаниуд эрэлт тогтвортой байна гэсэн хүлээлттэй байгааг харуулж байгаа аж. Нийлүүлэлтийн Менежментийн Институтиэс гаргадаг үйлчилгээний салбарын индекс дөрөвдүгээр сард 53.1 байсан бол тавдугаар сард 53.7 болж өсчээ. Шинжээчид тус индексийг 53.5 болж өснө гэж таамаглаж байсан байна. Харин орон сууцны зах зээл өсөлттэй байгаа нь үйлчилгээний салбарын өсөлтөд нөлөөлж байгаа ажээ. АНУ-ын Засгийн газраас төсвийн таналтыг хэрэгжүүлж байгаа учраас ажил олгогчид ажилтнуудынхаа тоог дорвитой нэмэгдүүлэхгүй байгаа гэдгийг шинжээчид онцолж байна. Ийнхүү АНУ-ын үйлчилгээний салбар өсөлттэй байгаа хэдий ч тус улсын эдийн засгийн 12 хувийг бүрдүүлдэг үйлдвэрлэлийн салбарын үзүүлэлт сайнгүй байна. Учир нь энэ долоо хоногийн эхээр Нийлүүлэлтийн Менежментийн Институтиэс гаргасан үйлдвэрлэлийн индекс 50-иас доош буюу агшилттай гарсан юм. Харин "Roseland" судалгааны байгууллагын тооцоогоор өнгөрсөн тавдугаар сард АНУ-д ажилтай иргэдийн тоо 135 мянгаар нэмэгдсэн нь таамаглаж байснаас хавьгүй бага үзүүлэлт болсон байна. Үүнээс гадна АНУ-ын Холбооны Нөөцийн Банк "Beige Book" тайлангаа өчигдөр танилцууллаа. АНУ-ын Төв банк тус улсын нутаг дэвсгэрийг 12 бүсэд хуваасан байдаг. Эдгээр 12 бүсийн 11 нь эдийн засгийн өсөлт багаас дунд зэрэг байсан гэж "Beige Book" тайланд онцолсон байна. Холбооны Нөөцийн Банкны бодлого тодорхойлогчид худалдан авч буй бондын хэмжээг хэзээнээс бууруулж эхлэх талаар хэлэлцэхдээ уг тайланд орсон мэдээллийг харгалзан үзэх ажээ. Гэхдээ АНУ-ын эдийн засгийн үзүүлэлтүүд харилцан адилгүй гарч байгаа учраас Холбооны Нөөцийн Банк бонд худалдан авах хөтөлбөртөө өөрчлөлт оруулах эсэхийг таамаглахад хүнд болж байна. Хэдий тийм боловч Холбооны Нөөцийн банкны тэргүүн Бэн Бернанке “Хөдөлмөрийн зах зээлд тогтвортой өсөлт гарвал худалдан авч буй бондын хэмжээг бууруулах талаар авч үзнэ” гэж мэдэгджээ. “Блумберг”-ийн судалгаагаар АНУ-ын эдийн засгийн жилийн өсөлт өнгөрсөн нэгдүгээр улиралд 2.4 хувь байсан бол хоёрдугаар улиралд 1.6 хувь болж буурах төлөвтэй байна. 

Э.Анхбаяр 

Холбоо барих: ankhbayar.e@bloombergtvmongolia.com 

minjma.g@bloombergtvmongolia.com