Холбооны Нөөцийн банкны Мөнгөний бодлогын хороо бодлогын хүүгээ 0-0.25 хувьд хэвээр нь хадгалахаа мэдэгдлээ. Мөн хөдөлмөр эрхлэлт, инфляцын түвшин бодитоор нэмэгдэх хүртэл бонд худалдан авах хөтөлбөрөө үргэлжлүүлж, сард 120 тэрбум ам.доллар зарцуулахаа бататгасан юм.

Түүнчлэн эдийн засгийн зорилтуудад хүрэх хүртэл тодорхой хугацаа шаардахаар байгааг Холбооны Нөөцийн банкны тэргүүн Жером Пауэлл онцоллоо. АНУ-ын эдийн засгийн сэргэлтийн хурд, хөдөлмөр эрхлэлтийн түвшин сүүлийн саруудад саарч байгаа аж. Тэр дундаа цар тахалд хамгийн их өртсөн салбарууд хүнд байдалд байгаа тул мөнгөний бодлогоо хэвээр нь үргэлжлүүлэхээр болж байна.

АНУ-ын ажил эрхлэлтийн түвшин өнгөрсөн сард 140 мянгаар доошилж, дөрөвдүгээр сараас хойш анх удаа буураад байгаа юм. Холбооны Нөөцийн банкны тэргүүн Жером Пауэлл "Эдийн засгийн сэргэлт зөвхөн “коронавирус” бус вакцинжуулалтаас ихээхэн хамаарч байгаа"-г дурдсан байна. Мөн эрүүл мэндийн салбарт тулгарч буй хямрал эдийн засаг, хөдөлмөрийн зах зээл, инфляцад хүнд дарамт болж байгааг онцолжээ.

АНУ-ын Холбооны Нөөцийн банкны тэргүүн Жером Пауэлл
“Конгрессоос бидэнд даалгасан мөнгөний бодлогын зорилтуудыг гүйцэлдүүлэхээр Холбооны Нөөцийн банк шаргуу ажиллаж байна. Хөдөлмөр эрхлэлтийг аль болох өндөр хэмжээнд байлгаж, үнийг тогтвортой түвшинд барих зорилтууд. Цар тахал дэгдсэнээс хойш бид эдийн засгийн сэргэлтийг хангаж, тогтворжуулахын тулд, мөн эдийн засаг дахь цар тахлын нөлөөг хязгаарлахын тулд шийдэмгий алхмуудыг авч, хэрэгжүүлж ирсэн. Өнөөдөр Төв банк бодлогын хүүг 0 хувьд ойр барьж, бондын худалдан авах хөтөлбөрөө үргэлжлүүлж байгаа. Эдгээр арга хэмжээнүүд нь эдийн засгийг бүрэн сэргэх хүртэл мөнгөний бодлогоор хүчтэй дэмжих боломжийг бий болгож байгаа юм.
Ажил эрхлэлтийн түвшнийг аль болох өндөр түвшинд байлгахын тулд инфляцын түвшин хоёр хувь байх шаардлагатай. Гэвч өнөөдрийг хүртэл инфляцын түвшин хоёр хувиас доогуур байсаар ирсэн. Гэхдээ бид тодорхой хугацаанд инфляцын түвшнийг хоёр хувиас давуулах зорилт тавин ажиллаж байна. Ингэснээр инфляцын дундаж хоёр хувьд хүрч, урт хугацаандаа инфляц хоёр хувьд хүрэх боломжтой болно гэж тооцоолж байна.
Ажил эрхлэлт болон инфляцад тавьсан зорилт хэрэгжих хүртэл энэхүү мөнгөний бодлогоо үргэлжлүүлнэ.
Харин бодлогын хүүний хувьд дээрх зорилтуудад тодорхой дэвшил гарах хүртэл 0-0.25 хувийн хооронд барих нь зүйтэй гэж бодож байна. Эдгээр зорилтод хүрэхийн тулд хугацаа хэрэгтэй. Тодорхой дэвшил, үр дүн гарахад урт хугацаа шаардагдах төлөвтэй байна” гэж мэдэгдлээ.

С.Өнөрсайхан

Холбоо барих: unursaikhan.s@bloombergtvmongolia.com

minjma.g@bloombergtvmongolia.com