Өнгөрсөн долдугаар сард АНУ-ын нэг сарын төсвийн алдагдал 97.6 тэрбум ам.долларт хүрсэн талаар тус улсын Сангийн яам мэдээллээ. Харин одоогийн санхүүгийн жилийн нэг сарын төсвийн тэнцлийн ашиг зургадугаар сард хамгийн өндөр гарч байжээ. АНУ-ын Засгийн газар өнгөрсөн сард 200 тэрбум ам.долларыг татан төвлөрүүлсэн бол зарлага нь үүнээс давж 297.6 тэрбум ам.долларт хүрсэн байна. АНУ-ын санхүүгийн жил өнгөрсөн оны аравдугаар сард эхэлснээс хойш эхний арван сарын хугацаанд төсвийн алдагдал 607.4 тэрбум ам.доллар болжээ. Эдийн засгийн хэмжээгээрээ дэлхийд тэргүүлдэг тус улсын төсвийн алдагдал Ерөнхийлөгч Барак Обамагийн өнгөрсөн сонгуульт дөрвөн жилийн хугацаанд дараалан нэг их наяд ам.доллараас даваад байгаа аж. Түүнчлэн эрүүл мэнд, нийгмийн төсөл хөтөлбөрүүдэд зарцуулах төсөв нэмэгдэж байгаагаас гадна АНУ-ын Засгийн газар Афганистаны дайнд их хэмжээний хөрөнгө зарцуулж байгаа нь төсвийн алдагдал нэмэгдэхэд ихээхэн нөлөө үзүүлсэн байна.

Э.Анхбаяр

Холбоо барих: ankhbayar.e@bloombergtvmongolia.com

minjma.g@bloombergtvmongolia.com