АНУ-ын Ерөнхийлөгч Дональд Трампын бүрэн эрхийн хугацаа дуусахад долоо хоног үлдээд байгаа энэ үед Төлөөлөгчдийн танхимаас түүнд итгэл хүлээлгэх асуудлыг дахин сөхөж, түүхэн санал хураалт явууллаа.

Ардчилсан намын бүх гишүүн, Бүгд Найрамдах намын 10 гишүүний нэгдсэн саналаар, 232:197-ийн харьцаатайгаар баталсан байна. Ингэснээр Дональд Трамп Төлөөлөгчдийн танхимаас хоёр удаа итгэл үзүүлээгүй АНУ-ын анхны Ерөнхийлөгч боллоо.

Одоо Сенатын шүүх хурлаар энэхүү асуудлыг эцэслэн шийдвэрлэх юм. Үүнээс өмнө Жо Байдены тангараг өргөх ёслол болж Дональд Трамп албан тушаалаа хүлээлгэж өгөөд байх хувилбар ч харагдаж байна.

Нэгдүгээр сарын 20-ны өдөр Жо Байдены тангараг өргөх ёслол болно. Үүнтэй холбоотойгоор Конгрессын ордны ойролцоох метроны 13 буудлыг энэ баасан гарагаас эхлэн тангараг өргөх ёслолын маргааш хүртэл хаахаар төлөвлөөд байна. Түүнчлэн Жо Байден өөрийн Засгийн газар дахь Үндэсний аюулгүй байдлын албан тушаалтнуудыг яаралтай баталж өгөх саналыг Сенатад илгээгээд байгаа юм.

Одоогоор АНУ-ын Конгрессын ордныг 24 цагийн өндөржүүлсэн хамгаалалтад оруулаад байгаа аж. Тангараг өргөх ёслолын үеэр нийт 20 мянга гаруй албан хаагч хамгаалалтад гарна хэмээн хотын захиргаанаас мэдэгдээд байна.

Ж.Зоригт

Холбоо барих: zorigt.j@bloombergtvmongolia.com

minjma.g@bloombergtvmongolia.com