“COVID-19”-ийн эсрэг вакцинжуулалтаар тэргүүлж буй АНУ-д баталгаажсан вакцины тоо нэгээр нэмэгдлээ. АНУ-ын зохицуулах байгууллага “Johnson & Johnson”-ийн вакциныг бүртгэж, яаралтай горимд хэрэглэх зөвшөөрөл олгожээ.

Мутацид орсон “коронавирус”-ийн халдварын асуудал тулгамдаж байгаа энэ үед тус улс гурав дахь вакцинаа бүртгэж байгаа юм. Ойрын хэдэн сардаа багтаж “AstraZeneca”, “Novavax”-ийн вакцинуудыг бүртгэх магадлалтай байна.

“Johnson & Johnson”-ийн нэг тунтай вакциныг 18-аас дээш насныхан хийлгэнэ. Энэхүү вакцин нь “COVID-19”-ийн халдвар хүндрэхээс сайн хамгаална, хийлгэсний дараа ноцтой сөрөг нөлөө байхгүй гэж АНУ-ын Хүнс, эмийн удирдах газар онцолжээ.

“Pfizer”, “Moderna”-ийн вакцинтай харьцуулахад тээвэрлэхэд илүү дөхөм, хөргөгчийн хэвийн горимд удаан хугацаагаар хадгалах боломжтой гэдгээрээ давуу талтай юм. Европын Холбоо энэхүү вакциныг энэ сарын эхээр бүртгэх магадлалтай байна. Түүнчлэн Европын Холбооны зохицуулах байгууллага бүртгэхийг хүлээлгүйгээр ОХУ-ын “Sputnik V” вакциныг хэрэглэж магадгүй гэж Чех улсын Ерөнхий сайд мэдэгдсэн байна. Зохицуулах байгууллага зөвшөөрөл олгосон даруй ашиглаж эхлэхээр төлөвлөжээ.

Үүнээс гадна “AstraZeneca” компани “Moderna”-д эзэмшдэг 7.7 хувийн хувьцаагаа нэг тэрбум гаруй ам.доллароор худалдсан талаар “The Times” мэдээллээ. Хувьцааны ханш нь огцом өсөөд байгаа аж. Хэдий тийм боловч талууд эмчилгээний талд түншлэлийн харилцаагаа хадгална.

“Moderna” энэ онд “коронавирус”-ийн вакцины борлуулалтаас 18.4 тэрбум ам.долларын орлого олох төлөвтэй гэж тооцоолсноо зарлажээ.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com