АНУ улс төрийн шалтгаанаар Венесуэлийн газрын тосны экспортод хориг тавьсны улмаас эдийн засагт нь 20 тэрбум ам.долларын хохирол учраад байгааг Венесуэлийн Газрын тосны сайд Мануэл Кьюведо мэдэгдлээ.

OPEC-ийн гишүүн Венесуэлийн нэгдүгээр сарын өдрийн гарц 1.3 сая баррель орчим буюу 2016 оны дунджаас хоёр дахин бага байгаа аж. Нэмэлт санхүүжилт татаж, худалдан авалтын гэрээ байгуулахгүй бол улам хүнд байдалд орохоор байгаа юм. Үүнээс гадна газрын тосны экспортоос төсвийн орлогынхоо 90 хувийг бүрдүүлдэг Венесуэлийн улс төрийн нөхцөл байдал улам хурцдаж, сөрөг хүчний тэргүүн Хуан Гуайдо өөрийгөө Ерөнхийлөгчийн үүрэг гүйцэтгэгч гэж зарлаад байна. Үүнтэй холбоотойгоор АНУ одоогийн Ерөнхийлөгч Николас Мадурогийн засаг захиргааг эсэргүүцэж байгаагаа илэрхийлэн тус улсаас газрын тос импортлохоо зогсоогоод байгаа юм. Ийнхүү төсвийн орлогын гол суваг хаагдсан учир венесуэлчуудын амьжиргаа эрсдэлд орж байна гэж сөрөг хүчний тэргүүн Хуан Гуайдо үзжээ. Николас Мадурогийн засаг захиргаа АНУ-аас илгээсэн хүмүүнлэгийн тусламжийг хүлээн авахгүй татгалзсан хэвээр байвал 300 мянган венесуэлчуудын амь нас эрсдэлд орно гэж тэрбээр онцолж байна. Тус улс АНУ-аас ирсэн тусламжийг Колумбитай хиллэдэг хил дээр гацааж, хоол хүнс түгээх ажлыг дотоодынхоо хүчийг дайчлан өөрсдөө зохион байгуулж байгаа ажээ.

М.Золбоо

Холбоо барих: zolboo.m@bloombergtvmongolia.com

minjma.g@blooombergtvmnogolia.com