АНУ-ын гадаад худалдааны алдагдал 12 дугаар сард хоёр жилийн дээд түвшинд хүрч өссөн байна. Энэ хугацаанд гадаад худалдааны алдагдал сарын дүнгээрээ 17.1 хувиар өсч, 46.6 тэрбум ам.долларт хүрсныг тус улсын Худалдааны яам мэдээллээ. Ам.долларын ханш чангараад зогсохгүй олон улсын эрэлт бууралттай байгаа нь алдагдал огцом өсөх шалтгаан болсныг тус яам онцолсон байна. Түүнчлэн импортын хэмжээ 2.2 хувиар өсч, 241.4 тэрбум ам.долларт хүрсэн нь америкчуудын эрэлт өндөр байгааг илтгэсэн үзүүлэлт боллоо гэж шинжээчид дүгнэж байна. Үүний зэрэгцээ АНУ-ын ажилгүйдлийн тэтгэмж хүсэгчдийн тоо түүхэн доод хэмжээнд хадгалагдсан хэвээр байгаа аж. Нэгдүгээр сарын 31-нээр эцэслэсэн долоо хоногийн хугацаанд 11 мянган иргэн шинээр хүсэлт гаргаснаар нийт тэтгэмж хүсэгчдийн тоо 278 мянгад хүрчээ. Гэхдээ энэ нь шинжээчдийн таамгийг давсан үзүүлэлт болсныг АНУ-ын Хөдөлмөрийн яам онцолсон байна. Хэдийгээр хөдөлмөрийн зах зээл өсөлтөө хадгалж, түлшний үнэ зарцуулалтыг дэмжсээр байгаа ч америкчуудын итгэлийн индекс нэгдүгээр сард бууралттай гарлаа. Түүхэн дээд утгаа аваад байсан энэхүү үзүүлэлт өнгөрсөн долоо хоногт 45.5 нэгж болж буурчээ.

Э.Эрдэнэтуяа

Холбоо барих: erdenetuya.e@bloombergtvmongolia.com

minjma.g@bloombergtvmongolia.com