АНУ-ын гадаад худалдааны алдагдал гурван жилийн хамгийн доод түвшиндээ хүрч буураад байсан бол өнгөрсөн дөрөвдүгээр сард нэмэгдсэн дүнтэй гарсан байна. Бараа бүтээгдэхүүн болон бизнесийн тоног төхөөрөмжийн импорт эргэн өссөн нь эдийн засгийн өсөлтийн талаарх сөрөг хүлээлтийг багасгаж байгаа аж. Тус улсын худалдааны алдагдал гуравдугаар сард 37.1 тэрбум ам.доллар байсан бол дөрөвдүгээр сард 8.5 хувиар өсч, 40.3 тэрбум ам.доллар болсон гэж АНУ-ын Худалдааны яамнаас мэдээллээ. Дэлхийн хоёр дахь том эдийн засаг болох БНХАУ-тай хийсэн худалдааны алдагдал гуравдугаар сард 17.9 тэрбум ам.доллар байсан бол дөрөвдүгээр сард 34.8 хувиар өсч 24.1 тэрбум ам.доллар болжээ. Харин импортын хэмжээ 2.4 хувиар өссөн байна. Ихэнх шинжээчид АНУ-ын худалдааны нийт алдагдлын хэмжээ 41.1 тэрбум ам.долларт хүрнэ гэж таамаглаж байсан аж. Бусад улсад үйлдвэрлэсэн гар утас, автомашин, сэлбэг болон компьютерийн эрэлт өссөн нь айл өрх болон компаниудын зарцуулалт нэмэгдсэнийг илтгэж байна. Түүнчлэн АНУ-аас бусад улсууд руу гаргадаг автомашин болон бараа бүтээгдэхүүний экспорт дээд хэмжээндээ хүрсэн нь дэлхийн эдийн засгийн өсөлт тогтворжиж байгааг илтгэж байгаа юм. Гуравдугаар сард АНУ-ын импортын мөнгөн дүн 222.3 тэрбум ам.доллар байсан бол дөрөвдүгээр сард 227.7 тэрбум ам.доллар болж нэмэгджээ. АНУ дөрөвдүгээр сард 29.6 тэрбум ам.доллараар гаднаас нефть худалдан авсан нь 2010 оны 11 дүгээр сараас хойшхи хамгийн бага хэмжээ болсон байна. Харин экспорт 1.2 хувиар өсч, нийт мөнгөн дүн нь 187.4 тэрбум ам.доллар болсон бөгөөд автомашин, сэлбэгийн худалдаа 586 сая ам.доллараар нэмэгдсэн нь нөлөөлжээ. 

Э.Анхбаяр 

Холбоо барих: ankhbayar.e@bloombergtvmongolia.com 

minjma.g@bloombergtvmongolia.com