“Хар баасан гараг”-т АНУ-ын онлайн худалдаа 7.4 тэрбум ам.доллар хүрч, түүхэн дэх хоёр дахь хамгийн өндөр борлуулалттай өдөр боллоо. Ингэснээр 2018 онд “Кибер даваа гараг”-аар борлуулалтын дүн 7.9 тэрбум ам.доллар хүрсний араас бичигдэж байна.

“Хар баасан гараг”-т худалдан авагчид дэлгүүрт урт дараалалд зогсохын оронд интернэт орчинд бүхэл өдрийг өнгөрөөсөн гэхэд хилсдэхгүй аж. Худалдан авагчид “Кибер даваа гараг”-ийг хүлээлгүй баярын улирлын эхэнд онлайн худалдан авалтаа нэмэх хандлага ажиглагдах болсон байна. Энэ жилийн “Хар баасан гараг”-т ухаалаг гар утсаар хийсэн худалдан авалт 2.9 тэрбум ам.доллар болж энэ төрлийн худалдан авалтын хамгийн дээд хэмжээ болжээ.

"Зул сарын баяр дөхөж байгаагаас худалдан авагчид урт дараалалд зогсохоос илүүтэйгээр гар утсаа ашиглаж байна" гэж “Adobe”-ийн шинжээч Тэйлор Шрейнер онцоллоо. Хэдий тийм боловч зарим худалдан авагч онлайн худалдааны оронд дэлгүүрээс худалдан авалт хийх хүсэлтэй хэвээр байгаа ажээ.

Дэлгүүрээс худалдан авалт хийсэн хүний тоо өмнө жилийн мөн үетэй харьцуулахад зургаан хувиар өссөн байна гэж судлаачид тооцоолсон байна. Тухайлбал: Нью-Йоркийн “Best Buy” электрон барааны дэлгүүрт “iPhone 11”, “iPhone 11 Pro” ухаалаг гар утсыг худалдан авахаар урт дараалал үүсжээ. “Adobe”-ийн тооцоогоор “Кибер даваа гараг”-ийн борлуулалт өмнөх оноос 19 хувиар давах төлөвтэй байгаа аж.

Э.Ундрам

Холбоо барих: undram.e@bloombergtvmongolia.com

minjma.g@bloombergtvmongolia.com