Өнгөрсөн аравдугаар сард АНУ-д нээлттэй ажлын байрны тоо сүүлийн таван жил гаруйн хамгийн дээд хэмжээндээ хүрч өссөн байна. Энэ нь ажил олгогчдын дунд эдийн засгийн төлвийн талаарх эерэг хүлээлт нэмэгдсэнийг харуулж байна. Хөдөлмөрийн яамнаас мэдээлснээр аравдугаар сард нээлттэй ажлын байрны тоо 42 мянгаар өсч 3.93 саяд хүрчээ. Энэ нь 2008 оны тавдугаар сараас хойшхи хамгийн өндөр үзүүлэлтэд тооцогдож байна. Үүнээс гадна бөөний худалдааны компаниуд нөөцөө сүүлийн хоёр жилд байгаагүй их хэмжээгээр буюу 1.4 хувиар нэмэгдүүлсэн нь компаниудын борлуулалт өснө гэсэн хүлээлттэй байгааг баталсан үзүүлэлтүүдийн нэг боллоо. Харин өнгөрсөн 11 дүгээр сард АНУ-д шинээр ажилд орсон иргэдийн тоо 203 мянга буюу шинжээчдийн таамаглаж байснаас өндөр хэмжээнд хүрсэн юм. Холбооны Нөөцийн Банкны удирдлагууд эдийн засгийг дэмжих зорилгоор худалдан авч буй бондынхоо хэмжээг бууруулах эсэхээ шийдэхдээ хөдөлмөрийн зах зээлийн үзүүлэлт, цаашдын төлөв болон бусад хүчин зүйлүүдийг харгалзан үзэх юм байна. АНУ-ын Төв банкны бодлого тодорхойлогчид энэ сарын 17, 18-нд хуралдаж бондын хөтөлбөрийн талаар хэлэлцэнэ. 

Э.Анхбаяр 

Холбоо барих: ankhbayar.e@bloombergtvmongolia.com 

minjma.g@bloombergtvmongolia.com