Германы Канцлер Ангела Меркелийн тэргүүлдэг “Христийн ардчилсан холбоо” намын жилийн ээлжит хурал болж өндөрлөлөө. Энэ үеэр Ангела Меркель дүрвэгсдийн урсгалыг бууруулна гэдгээ намын гишүүддээ амлажээ. “Христийн ардчилсан холбоо”-ны гишүүд дүрвэгсдэд нээлттэй бодлогыг анхнаас нь дэмжээгүй бөгөөд тиймээс Ангела Меркелийн энэ удаагийн шийдвэрийг намын ихэнх гишүүд баяртайгаар хүлээн авчээ. 2015 он гарсаар Герман улсад нэг сая гаруй дүрвэгч ирээд байгаа төдийгүй цаашид ч энэ тоо өсөх хүлээлттэй байна. Тиймээс Ангела Меркель германчуудын төлөө, европчуудын төлөө мөн эх орноо орхиж байгаа дүрвэгсдийн төлөө шийдвэрээ гаргасан гэдгээ мэдэгдэлдээ онцолжээ. Германы Канцлер Ангела Меркель “2015 он Грекийн өрийн хямрал, уур амьсгалын өөрчлөлт, Ойрхи Дорнод дахь эмх замбараагүй байдал зэрэг шийдвэрлэх ёстой олон асуудлаар дүүрэн жил болж өнгөрч байна. Гэхдээ цаашид ч мөн дүрвэгсдийн хямралын эсрэг Европын орнуудыг нэгтгэх мөн Турк улстай энэ тал дээр хамтрах зэрэг олон сорилт хүлээж байна” хэмээн мэдэгдсэн байна.

Э.Эрдэнэтуяа

Холбоо барих: erdenetuya.e@bloombergtvmongolia.com

minjma.g@bloombergtvmongolia.com