Нэгдүгээр сарын 29-ний байдлаар Төв банк 183 кг алт худалдаж авсан байна. Энэ нь өмнөх оны нэгдүгээр сард худалдаж авсан алтны хэмжээтэй харьцуулахад зургаа дахин бага дүн болж байна.

Ашигт малтмалын тухай хуульд нэмэлт өөрчлөлт оруулах тухай хуулийг УИХ 2018 онд багтаан хэлэлцэж, баталж амжаагүйгээс шалтгаалан алтны татвар ес орчим хувь болж өсөх нөхцөл бүрдээд байгаа юм. Үүнээс өмнө татварын хөнгөлөлт 2.5 хувийг таван жилээр сунгахгүй бол Монголбанканд тушаах алтны хэмжээ буурах эрсдэлтэй гэж Төв банк сануулж байв. Монголбанкны Эрдэнэсийн сангийн захирал П.Эрдэнэтуяа "Төв банк алтны татварыг нэмэх нь цаг хугацааны хувьд тохиромжгүй гэж үзэж байна. Сүүлийн 30-аад жилийн алтны тушаалтад дүн шинжилгээ хийгээд үзэхэд татварын хувь хэмжээтэй шууд холбоотой байдаг" гэж мэдэгдэж байсан юм. Учир нь Төв банк гадаад валютын албан нөөцөө зузаатгах төлөвлөгөөтэй байна. 2018 он хувьд алтнаас 700 гаруй сая ам.доллароор валютын нөөцөө зузаатгажээ.

Цаашид дунд хугацаанд гадаад валютын албан нөөцийг 6.5 тэрбум ам.доллар хүргэхээр 2019 оны Мөнгөний бодлогын үндсэн чиглэлдээ тусгасан юм. Ирэх жилүүдэд төлөх өр төлбөр, гадаад эдийн засгийн тогтворгүй байдал зэргээс үүдэж валютын нөөцийг нэмэгдүүлэх шаардлага үүсээд байна. Энэ талаар Олон Улсын Валютын Сан Монгол Улсын гадаад валютын албан нөөцөд эмзэг байдал оршсоор байна гэж өмнө нь сануулж байсан юм.

Б.Бямбасүрэн|@byambasuren_b

Холбоо барих: byambasuren.b@bloombergtvmongolia.com

minjma.g@bloombergtvmongolia.com