Монголын Хөдөлмөрийн төв биржид бүртгэлтэй ажилгүй иргэдийн тоо өмнөх оны арванхоёрдугаар сараас 1400 хүнээр нэмэгдэж, 157 шинэ ажлын байр бий болжээ. Харин бүртгэлтэй байгууллагуудаас Хонгконгийн хөрөнгө оруулалттай ачаа тээврийн чиглэлээр үйл ажиллагаа явуулагч Сункфа компани хамгийн олон буюу 251 хүнд шинээр ажил олгосон байна. Өнгөрсөн сард аймаг, нийслэлийн хөдөлмөрийн хэлтэст ажилгүй 4200 иргэн шинээр бүртгүүлж, 978 иргэн ажилд зуучлагдсан байна. Гэвч ажил идэвхитэй хайдаггүй гэсэн шалтгаанаар 2800 иргэн бүртгэлээс хасагджээ.

Бүртгэлтэй ажилгүй иргэдийн 58.2 хувийг 15-34 насны залуус эзэлсэн хэвээр байгаа бол төвийн болон говийн бүсийн 10 аймагт ажилгүй иргэдийн тоо улсын дунджаас 0.1-14.8 пунктээр их байна гэж Үндэсний Статистикийн Хорооноос мэдэгджээ. Дээр дурдсан 157 шинэ ажлын байранд ажилтан элсүүлсэн бөгөөд үүний 26.1 хувийг нь барилга, 13.4 хувийг хөдөө аж ахуй, 12.1 хувийг уул уурхайн салбар эзэлж байна.

Хонгконгийн хөрөнгө оруулалттай Сункфагаас гадна Чанцин, УБТТС, Жигүүр Гранд, Могол Ноос зэрэг компаниуд Хөдөлмөрийн төв биржид бүртгүүлснээсээ хойш хамгийн олон ажлын байрыг бий болгоод байгаа аж.Ажил хайгч талаас бичиг хэрэг, теллер, бүртгэл мэдээллийн ажилтан, хүнсний технологич зэрэг ажлын байр хамгийн эрэлттэй байгаа бол ажил олгогчдын зүгээс нягтлан бодогч, маркетингийн менежер, төслийн удирдагч, цахилгаанчин зэрэг мэргэжил хамгийн эрэлттэй байна.