Автомашин, сэлбэг худалдаа болон дагах үйлчилгээг нэг дор төвлөрүүлэх Авто худалдааны цогцолбор ням гарагт нээлтээ хийлээ. Эхний ээлжинд 30 га талбайд 6375 авто зогсоол, 22-ын товчоо хүртэлх 1.5 километр авто замыг ашиглалтад оруулсан байна. Эхний ээлжийн бүтээн байгуулалтад 20 гаруй тэрбум төгрөгийн санхүүжилт хийсэн талаар Нийслэлийн Засаг Даргын Тамгын газраас мэдээлж байсан юм. Одоогоор цогцолборын нийт зогсоолоос 1200-г нь тус бүрийг нь дөрвөн сая төгрөгөөр худалдсан байна. Үүнээс төвлөрсөн орлогыг цогцолборын дараагийн бүтээн байгуулалтад зарцуулахаар төлөвлөсөн байна. Цаашид “Нарантуул” худалдааны төвөөс зургаа дахин том буюу нийт 130 га талбай хамрах цогцолборт банк, Төрийн үйлчилгээ, даатгал, засварын төвүүдийг байгуулах ажил үлдээд байгаа юм. Эхний ээлжийн бүтээн байгуулалтын хувьд товлосон хугацаанаасаа бүтэн жил хоцорсон ч амжилттай ашиглалтад орлоо. Авто худалдааны цогцолбор нээгдэхтэй зэрэгцээд Нийслэлээс “Да хүрээ”, “Өгөөмөр” захуудын үйл ажиллагааг зогсоож, нүүлгэхээр төлөвлөөд байгаа бол захуудын удирдлагууд болон зарим түрээслэгчид шийдвэрийг хүлээн зөвшөөрөхгүй гэдгээ илэрхийлээд байгаа юм.

Д.Хаш-Эрдэнэ

Холбоо барих: khasherdene.d@bloombergtvmongolia.com

minjma.g@bloombergtvmongolia.com