Австралийн дотоодын нийт бүтээгдэхүүний өсөлт сүүлийн таван улирлынхаа доод түвшинд хүрч, 0.5 хувиар өссөн байна. Ингэснээр Австралийн Төв банк бодлогын хүүгээ түүхэн доод түвшинд нь хадгалах магадлал улам өслөө. Харин тус улсын эдийн засгийн өсөлт удаашрахад таваарын ханш олон улсын зах зээлд унасан болон австрали долларын ханш чангараад байгаа нь голлон нөлөөлсөн гэж “HSBC” банк мэдээлжээ. Өнгөрсөн 20 гаруй жилийн хугацаанд 70 центтэй тэнцэж байсан австрали долларын ханш сүүлийн гурван жилд 99 цент болж чангараад байна. Үүнд АНУ болон Японы Төв банкны мөнгөний зөөлөн бодлого голлон нөлөөлжээ. Мөн Австрали улс нүүрс болон төмрийн хүдэр олборлогч компаниудаас авдаг ашгийн 30 хувийн татварыг цуцлахаар болсон байна. Энэхүү шийдвэр нь хөрөнгө оруулалтыг нэмэгдүүлж, уул, уурхайн салбарт шинээр ажлын байр бий болгох давуу талтай гэж “Rio Tinto” группийн Гүйцэтгэх захирал Сэм Уолш мэдэгджээ. 2012 онд баталсан дээрх татвар нь өмнөх Засгийн газрын хамгийн муу шийдвэрт тооцогдож байв. Энэхүү шийдвэрээр Австралийн төсвийн орлого 0.1 хувиар өссөн гэж “HSBC” банк мэдээлжээ. Харин Австралийн Засгийн газар шийдвэрээ гаргахын тулд төсвийн зарцуулалтаа танах хэмжээг 6.5 тэрбум австрали доллараар багасгасан байна. Ингэснээр ойрын хугацаанд 10 тэрбум австрали доллараар төсвөө танахаар болсон гэж Австралийн Ерөнхий сайд Тони Аббот мэдээлжээ.

Д.Хаш-эрдэнэ

Холбоо барих: khasherdene.d@bloombergtvmongolia.com 

minjma.g@bloombergtvmongolia.com